قصة حملي و ولادتي الخطره
 |
| قصة حملي و ولادتي الخطره |
اصعب ايام واشهر مريت بيها هي الحمل بطفلتي الي هي رابع طفل الي وعدد الاسقاطات الي خسرت بيها اطفالي (5) وسبب هذة الاسقاطات مجهوله , وحملي باطفالي الباقين كان صعب وبصعوبه يثبتون لحد مااوصل التاسع اثنين منهم بشهر الثامن ولدتهم وثنين منهم بالتاسع لكن الاهم بكل الي حدث معي هو معاناتي الصعبه جدااا جداااا بطفلتي الرابعه , الي من يوم حملي بيها لحد ولادتي اني عانيت من عذاب مدمر جسدي ونفسي عانيت من نزيف قوي لحد شهر الخامس بيها بحيث ماتوقعت تبقه توقعت يصير اسقاط لكن من كنت اراجع طبيبات كلها تقول الي انو السبب هو المشيمه وانو المشيمه لاصقه على جرح العمليات السابقه وانها قريبه جدا من عنق الرحم وطلبوا مني الطبيبات انو انام واستمر باخذ مثبتات و3 انواع كانت من المثبتات هي ابر وحبوب وتحاميل لكن من وقف النزيف بشهر الخامس بقيت استخدم حبوب مثبته لكن الخوف الاكبر والتوقع الي خايفين منه ان يحدث انو المشيمه تظل لاصقه ويضطرون الى استئصال الرحم اثناء الولاده وظليت اراجع طبيبات وسونرات و4Dهم اخذت حتى يتاكدون من وضع المشيمه وفعلا طلع المشيمه ملاصقه للرحم وداخله بي وعندما وصلت شهر الثامن بدت تصير عندي علامات الولاده ,
للعلم اني خلال الاشهر الماضيه لحد ولادتي اني الالام بجسمي كله بلاضافه الى الورم الي ورمته فضيع كنت اعاني من انام من اتحرك عذاب لايوصف المهم الكل نصحني انو اراجع دكتوره مضبوطه ومتمكنه حتى تستطيع انو تسويلي العمليه لان عمليتي تعتبر عمليه فوق الكبرى ,
بلاضافه انو فقر دم عندي 7.5 واني مصابه بثلاسيميا لااستطيع اخذ الحديد ولااكل اكل غني بالحديد حتى وان اكلت مااستفاد منه اله بنقل الدم ...
وبعد نقاش وسؤال وتجارب غير ابحث بي عن دكتوره مضبوطه وفعلا وجدتها وذهبت الها وطلبت مني سونرات جديده ورنين حتى تتاكد من وضعي ومن سويت كل الي طلبت ااكدت الي انو السونرات والرنين يؤكد على رفع رحمي خلال الولاده بوقتها نهاريت وبجيت مااعرف شصار بيه المهم بعدها بأيام الكل تواسيني ويطلبون مني ان ارضى بقدري واطلب من ربي ان اطلع اني والطفله بخير وفعلا هيات نفسي لهذا الشي بعدها شتدت حالتي ودخلت مستشفى وتابعتني المقيمات لهذه الطبيبه مدة 3 ايام تحت المراقبه وبعدها خرجت وهم بعد ايام رجعت اشدت حالتي ودخلت مستشفى لكن هل المره كانت غير عن السابقه لان عند الساعه 10 ليلا زادت التقلصات وقرروا انو ادخل العمليات وكنت حالمل بشهر الثامن 20 يوم بي يعني بعد 10 ايام ادخل شهر التاسع المهم طلبت انو دكتورتي الاراجعها هي تحضر وتجري الي العمليه والجواب كان انو الطبيبه متحضر بالليل علمودج واحنه نجريها الج اني نهاريت ولان خفت وترددت انو ادخل العمليات الطبيبات بدأن بالصراخ عليه وبكلام حقير ويقولون الي يله طبي نسويلج العمليه انتي عمليتج صعبه وفوق الكبرى ومنو يكول تعيشين ومنو يكول الطفله تعيش بحيث صرت ابجي ودمروا نفسيتي , واني بملابس العمليه تخيلوا مريضه يحطموها نفسيا ويحجولها بموتها وبموت طفلتي لحد الان ماانسى الصار بيه والسوو بيه وبالعمليه صاير خطا عدهم وشقوا الي المثانه وصار نزيف عندي وطلبوا من الجراحه ان تحضر للعمليات وحضروا للصاله ومخيطين مثانتي والرحم مرفعوا لكن مستاصلين اجزاء منه الي مغروسه بي المشيمه ومن خرجت من الصاله العمليات الي مدتها (4) ساعات دخلت 10 ونص خرجت 2 ونص حسب كلام زوجي واختي وخالتي خرجت صوندات 2 لعمليه المثانه وصونده للمثانه لخروج الادرار وكانت حالتي خطره , ظليت تحت العنايه بعدها يومين اكتشفوا انو امعائي متوقفه وبطني نفخت لدرجت الانفجار بحيث الالم الي عانيت منه لايوصف وصلت درجة اسحب ايد الدكتورات اقبلها بس حتى تخلصني من الام وابجي بحركة الم الى ان استدعوا الجراحيه وفحصوني وفعلا امعائي متوقفه نهائي وقرروا ان يضعوا صونده بخشمي لحد معدتي حتى تخرج الافرازات الي دترجعها الامعاء للمعده وكانت عباره عن افرازات خضره اللون وطعم حارق ومر لايطاق .
وظليت اعاني من هذه الالام مع متابعة الجراحه البوليه والجراحه الباطنيه والقلبيه لان قلبي هم كان تعبان باثناء الحمل واستمروا ينطوني مغذي بوتاسيوم لمدة يومين قرروا اذا مافادني المغذي راح يظطرون الى فتح بطني من جديد ويجرولي عمليه لفتح الانسداد بأمعائي والجراحه البوليه , كذلك شكت انو المثانه احتمال مملتئمه هم يجرولي عمليه لان السوائل الي كانت تخرج من العمليه بواسطه الصوندات المنتهيه بكيس كانت لونها يشبه لون الادرار فاقترحوا ان يحللون هذا السائل اذا طلعت النسب عاليه معناها ادرار واذا نسب طبيعيه يعني سوائل جسم والحمد طلعت طبيعيه لكن بقت الامعاء وقلبي ،فشغلة قلبي حولوني لايكو اني بالموت اتحرك والصوندات مال عمليه والادرار والي بأنفي 4 صوندات وبكرسي متحرك رحت اخذت الايكو طبعا مااوصفلكم الالم من اتحرك بديت باخر ايام اقتنع انو خلص هذه ايامي الاخيره لان ورمت هواي حتى مكان للكالوه ماكو ايدي صارت عباره عن منخل من الجك حتى يلكون وريد استعانوا بممرضات الخدج حتى تلكه الي وردي لان المغذيات والدم والبلازما والكرايو كلها تحتاج اورده طبعا مغذي البوتاسيوم المفروض يكون اعطاء بطيء جدا على مده 6 ساعات لكل بطل واتخيلوا انو المفروض بطل بعد بطل بدون توقف ودم 10 ابطاله احتاجيت 2 قبل العمليه والباقي اثناء العمليه وبعدها وكذلك 20 بلازما و6 كرايو وابر ضد التخثر وانتبايتك ومغذيات لان مدة 8 ايام بقيت اني بدون لا اكل ولاشرب فقط مغذيات وبعد ايام بفضل دعاء الاهل والاصديقات والاقرباء والمعارف كلها كانت تدعيلي بالشفاء والصلاة والبكاء عليه رب العالمين استجاب دعائهم وامعائي اتحركت شويه الحمد لله ورفعولي صونده البلانف وبعدها ثامن يوم قبل خروجي رفعولي الصوندتين الخاصة بالعمليه .
بقت صوندت الادرار تبقة مدة اسبوعين يله ترفع وطبعا مؤلمه جدا احسب الساعات حتى اخلص منها بهاي الفتره بنتي عند اهل زوجي وبعد خروجي كنت منتظره لحظة احضن بنتي بحضني واشوفها ومااوصفلكم لحظة شوفتها ولحظة وصولي للبيت كانت معجزه الي والطريق كان يمر سنه من خروجي من المستشفى لحد وصولي للبيت ورجعت الاطفالي والزوجي والبيتي والحياتي الي كنت بديت افقد الامل منها
الف الحمد والشكر الف الحمد والشكر
شكرا لكم
🔸▬▬▬▬▬▬▬▬▬▬▬▬▬▬▬▬▬▬▬▬▬▬🔸
التعريف بالموقع :
هذا الموقع تابع لاحمد الداوودي بشكل رسمي وكل ما ينشر في الموقع يخضع للمراقبة وموقع احمد غير مسؤول عن التعليقات على المواضيع كل شخص مسؤول عن نفسه عند كتابة التعليق بحيث لا يتحمل موقع احمد الداوودي اي مسؤولية قانونية حيال ذلك